أعمِدة حَنين.

تذكر عرسك محمّد ؟!

كِذا تنساني يا محمّد ؟
كِذا تهجرني يا محمّد ؟
مضت شهرين يا محمّد و انا اعاني
و انا استنّى
و انا أنطر تجي لحظه و تذكرني
أو اطري لك

تذكر عرسك محمّد ؟
تذكر يوم انا أوقف
في آخر صف بالزفّه ؟
تذكر يوم انا أنظر
يمّك، و ارتجي لفته ؟؟
تذكر حرقة دموع ٍ
كانت في وسط عيني ؟
تذكر وقتها شموع ٍ
وينها بس و انا ويني ؟

كان الجو به ضحكه
به فرحه لكل الناس
كان الجو به طير ٍ
طاير منتشي حَسّاس

ما صَـدّق يطفّوا النور
و جا لحظه على كتفي
يغنّي لي .. يونّسني
يذكّـرني عنا الماضي
شقا الحاضر، و كل ما فات!

يذكّرني دفا وعودك
“
بيت ممتلي أولاد
نربّيهم على الطاعه
على القـوّه
على الأمجـاد
و معهم بنت أمّـوره
سألتك : وش نسمّيها ؟
قلت لي : نوره يا “نوره” !
و أكبرهم ترى فيصل
أحبك والله يا “ام فيصل” !
“
تذكر يوم توعدني
نروح بشهرنا أبها ؟
و تحلف لي
تعشّـيني
بمطعم في وسط أبها ؟

و اقول لك : لا أنا فديتك
أبي ديره بلا ” شمغان ” !
بها ثلج و بها مرج و بها موضه و بها ألوان

تذكر كنت اغني لك:
” عسانا ما نتفارق يوم “
و أترجّـاك :
غـنّي لي
بس اليوم .. بس اليوم

آ يا ويلي يا محمّـد ،
بعيني دمعه مخنوقه تبي تطلع
و قلبي كاتم العبره يخاف الناس تتطلّع
و طيرك مل من حزني
يبي يقلع .. يبي يقلع
بياخذ أقنعة فرحي معه و يرفرف موَدّع

آ يا ويلي يا محمّد ،
هذا الطير و منّي طار
تارك لي معي ريشه
بها عطر و بها أشعار

بها أشعار زفّتكم
و بيتٍ وسط هالزفّه يتغنّى ببدايتكم
يقول : المعرس اللي صار
فارس في نظر نوره
نزفّه الليله يَم نوره
…

يَـم نوره ؟! يَـم نوره ؟!
أنا نوره !
أنا نوره .. و من هـذي ؟؟

- هذي نوره يا ” نوره “
عريسك قال : ابي نوره
و أمّه طارت لنوره .. و جابتها !!

عريسك قال : ابي نوره
بنت العمّه يا يمّه ..
و أمّه قالت ” الحرمه ذي مانيب ادانيها “
و أخطب بنتها للزين ؟
.. بعيده عن أمانيها

تبي نوره ؟
بأخطب لك .. أزين منّـها نوره
تبي نوره ؟
بأخطب لك .. أسنع منّـها نوره

و لا تجادل بكلماتي
رضا الله من رضا أمّـك
تبي تلحقك لعناتي ؟؟
…

أيا محمّـد
و لا خبّرتني بالقادم الآتي
كِـذا تتركني أتحسّـر
و اعاني حيل و احاتي ؟

أيا محمّـد .. دفا حبّـك
ينضح بين كلماتي
أيا محمّـد .. أبي قربك
و ذا واقع معاناتي

أيا محمّـد
وراهم راحوا من حولي ؟!
أيا محمّـد
تعبت و زادت حمولي
أيا محمّـد
أمّـك حيـــل مسروره !
أيا محمّـد
عروسك ماهي بالصوره

أيا محمّـد .. طلبتك بس
أمانه تمسك يديها
كِـذا خايف على احساسي أشوفك و انت تغليها ؟!!

أيا محمّـد
أنا انادي .. و كلماتي بليّـا صوت
تصرخ في وسط صدري
تناجي حزني المكبوت

أخاف اضيّـع افراحك بأحزاني
أيا محمّـد
تدري وش اللي عـزّاني ؟؟

نظراتك قبل تطلع كانت تذرف الدمعه
مدري دمعة الفرقا ..
أو دمعه لسبب ثاني ؟!
…

أيا محمّـد .. و لو جاني
واحد اسمه محمّـد
بـ أحمد ربّي أعطاني بدال محمّـد ” محمّـد “

تدري ليه أتمنّاه
يجيني و اسمه محمّـد ؟
أخاف انساه
و أنطق ليلةٍ بـاسمك
/
و يسمعني !
و لا أقوى أخبّـيها

دموع الشوق يا عمري
مدري كيف اداريها؟

أيا محمّـد .. و لا تغـرّك
ضحكاتي ما بين النّـاس
ترى داخل وسط صدري
قلبٍ صادقٍ حسّـاس
يدعي لك بكل اخلاص

ربّي احفظ محمّـد
ربّي وفـّق محمّـد
ربّي متـّعه بنوره
ربّي و ارزقه بنتـ(ن)
حلوه حيل و أمّـوره

و ساعدني أنا أنسى
أنا متأكده بـ انسى
و لو ما هو عقب باكر
يمكن لو عقب شهرين
أو حـتّى سنه و سنتين

” بَأرفع أشرعة حزني
و ألقى لقاربي مرسى “